25.09.07
Միկրոէլեկտրոնիկայի բնագավառում էլեկտրոնային ավտամատ նախագծման համաշխարհային առաջատար “Սինոփսիս” ընկերությունն այսուհետ Երեւանում կգործի տեղեկատվական տեխնոլոգիաների գիտահետազոտական եւ նախագծման նոր ու ժամանակակից մասնաշենքում: Ճարտարագիտական եւ ուսումնական կոնտրոնի նոր շենքի բացման արարողությանը ներկա էր ՀՀ նախագահ Ռոբերտ Քոչարյանը, ով “Սինոփսիս”-ի նախագահ եւ գլխավոր օպերացիոն տնօրեն Չի-Ֆուն Չանի հետ կտրեց խորհրդանշանական ժապավենը:
“Վիասֆեր տեխնոպարկի” տարածքում գտնվող 9 հազար քմ մակերեսով մասնաշենքը տեղավորում է մոտ 500 աշխատող եւ ավելի քան 120 ուսանող: Մասնաշենք է տեղափոխվել Հայաստանի պետական ճարտարագիտական համալսարանի “Միկրոէլեկտրոնային սխեմաներ եւ համակարգեր” միջդեպարտամենտալ ամբիոնը, որին ժամանակակից համակարգչային տեխնիկայով հագեցված հինգ լսարան է հատկացվել:
ՀՀ նախագահ Ռոբերտ Քոչարյանի խոսքերով` “Սինոփսիսը” հիմնարար կերպով մտավ հայկական շուկա, եւ դա կարող է լավ օրինակ ծառայել մյուս ընկերությունների համար, որոնք եւս արդյունավետորեն գործում են Հայաստանում: ՀՀ նախագահը նշեց, որ տեղեկատվական տեխնոլոգիաների դաշտը բարենպաստ է յուրաքանչյուր ներդրում կատարել ցանկացողի համար, ոլորտի հետագա զարգացմանը խոչընդոտում է միայն մասնագետների պակասը: ՀՀ կառավարության կողմից հատկացված ուշադրությունն ու տեղեկատվական տեխնոլոգիաների ոլորտի գերակա ճանաչումը մեծապես օգնել է նաեւ երիտասարդներին մասնագիտության ընտրության հարցում, քանի որ հատուկ ծրագրային մոտեցումը խրախուսում է նաեւ բնակչությանն ավելի մեծ ուշադրություն դարձնելու ոլորտին:
“Հայաստանն այսօր աշխարհում ամենից արագ զարգացող երկրներից է, բարեփոխումների որակի առումով եւս լավագույններից է”,-ասաց ՀՀ նախագահը` հիշատակելով միջազգային կազմակերպությունների գնահատականները: Ոլորտի զարգացման համար պետք է անել հնարավորը, որպեսզի տեղեկատվական տեխնոլոգիաներն իրենց ծանրակշիռ դերն ունենան տնտեսության մեջ: ՀՀ նախագահի խոսքերով` ոլորտի զարգացման տեմպը կարող էր ավելի արագ լինել: Մեծ խնդիր է մասնագետների պակասը, սակայն, ըստ Ռ.Քոչարյանի, “Սինոփսիս”-ի եւ այլ կազմակերպությունների նմանատիպ ծրագրերի իրականացումը հիմք է ստեղծում հետագայում ավելի լուրջ եւ ծանրակշիռ զարգացում ապահովելու համար:
“Սինոփսիս Արմենիա” ընկերության գլխավոր տնօրեն Հովիկ Մուսայելյանի խոսքերով` մասնաշենքի համակարգչային կենտրոնը տարածաշրջանում աննախադեպ է իր հզորություններով: Հ.Մուսայելյանը պատիվ համարեց, որ ընկերության “նոր միջավայրի” պաշտանական բացումը կատարում է ՀՀ նախագահը, ով անցած երեք տարիների ընթացքում անընդհատ խրախուսել է ընկերությանը, “գլխավոր երաշխավորն է եղել, որպեսզի ընկերությունը կատարի աննախադեպ ներդրումներ տեխնոլոգիաների եւ կրթական համակարգի զարգացման մեջ”:
“Սինոփսիս” ընկերության նախագահ եւ գլխավոր օպերացիոն տնօրեն Չի-Ֆուն Չանի գնահատմամբ` Հայաստանն իր պատմության նշանակալի պահերն է ապրում. անցումային փուլն ավարտելով` վերահաստատում է իրեն այն ազգերի թվում, որոնք գնահատում են ինտելեկտն ամենից ավելի: Ըստ նրա` համաշխարհային նոր հանրությունն ինտելեկտի վրա հիմնված հանրություն է, որը փոխկապակցված է ժամանակակից հեռահաղորդակցության միջոցներով: “Նոր հանրությունն աշխարհի քաղաքական սահմաններից դուրս է գործում, որտեղ լրացուցիչ հնարավորություններ են բացվում մարդկային եւ տնտեսական զարգացման համար”,-ասաց Չի-Ֆուն Չանը:
“Սինոփսիս Արմենիա” ընկերության գլխավոր գործադիր տնօրեն Ռիչ Գոլդմանը տեղեկացրեց, որ նոր բացված մասնաշենքն ԱՄՆ-ից դուրս ընկերության ամենամեծ շինությունն է. միայն շենքում 6,5 միլիոն դոլար է ներդրվել:
Ռ.Քոչարյանը ծանոթացավ շենքային հնարավորություններին, ընդունեց ՏՏ ոլորտի ՀՀ նախագահի մրցանակների արժանացած ուսանողներին եւ աշակերտներին: Երիտասարդ ծրագրավորողների բարձրացրած բազմաթիվ հարցերը ՀՀ նախագահից ստացան իրենց պատասխանները: Նախագահը համաձայնեց նրանց հետ, որ ոլորտում ներդրումների խրախուսման համար պետք է համընթաց զարգացնել ամբողջ շղթան` դպրոց-բուհ-աշխատանք առաջատար ընկերություններում: Նորացվում են դպրոցներում ինֆորմատիկայի դասավանդման ծրագրերը, 12-ամյա կրթական համակարգում կավելացվեն դասաժամերը: Դպրոցներն ապահովվում են համակարգիչներով, ինտերնետ ծառայությունների մատուցման ոլորտում եւս մեծ ներդրումներ են կատարվում, նոր մալուխային գծեր, նոր սարքավորումներ են ներմուծվում, որոնք ինտերնետի մատուցման նոր որակ կապահովեն:
“Սինոփսիս Արմենիա” ընկերությունը Հայաստանում գործում է 2004թ-ից` ՀՀ կառավարության կողմից տեղեկատվական տեխնոլոգիաները երկրի զարգացման գերակա ուղղություն հռչակելուց հետո: “Սինոփսիս”-ի գլխամասային գրասենյակը գտնվում է Կալիֆորնիայի Մաունթին Վյու քաղաքում, ընկերությունն ունի ավելի քան 60 գրասենյակ Հյուսիսային Ամերիկայում, Եվրոպայում, Ճապոնիայում, Ասիայում:
ԱՐՄԵՆՊՐԵՍ
|
